قصة عجيبة

السلام عليكم ورحمة الله وبركااااته ...

أسعد الله مساءكم وصباحكم ..

وأعمكم بالفائدة جميعا ..

اليوم حبيت اني أحكي لكم بعض القصص والروايات الحقيقية والواقعية ...

وبعض القصص اللتي وقعت لي انا شخصيا وبعض منها سمعتها من بعض الأصدقاء والاحباء ...

فقلت في خاطري اني انقلها لكم علها تنفعكم وتستفيدون منها ..

البعض من هذه القصص مسلية ومضحكة وبعضها مخيفة وبعضها ينشف الريق ...

مع اني ما أعرف كيفية القاء القصص والروايات ..

ولكني بكتبها لكم بطريقتي الخاصة اللي اتمنى انكم تفهمون منها كل شي ...

وكل قصة جديدة اتذكرها سأقوم بكتابتها لكم هنا ..

تقبلوا مني أجمل وارق التحيات

أخوكم

(* 1 *)

قصة واقعية حدثت في مدينة أبوظبي .. في عام 2001 في أول ايامي عندما كنت اعمل في قسم الاسعاف والانقاذ ..

طبعا قسم الاسعاف والانقاذ يوفر سيارات اسعاف .. وبها مسعفين وممرضين .. وانا يومها كنت متحمس .. تعرفون .. جديد في العمل .. وخصووصا اني كنت جديد في هالقسم ... المهم ... كنت مداوم ساعتها في وقت الظهيرة عند الشلال في شارع الكورنيش ..في الساعة 5 العصر أعتقد وصلنا بلاغ عن وجود حالة سقوط من عمارة في شارع حمدان .. توجهنا بأقصى سرعة الى مكان الحادث .. وهذا كان أول حادث يمر علي وأول حالة أشوف فيها دماء ..

المهم توجهنا لمكان الحادث وبأقصى سرعة .. وصلنا لمكان البلاغ وشاهدنا امرأة متعلقة على حبال السقالة

(( السقالة )) : هي ما يقف عليها الأشخاص لتنظيف زجاج العمارات ...

المهم .. وأول ما وصلنا لمكان البلاغ شاهدت المرأة وهي تسقط أما عيني ... من الطابق الخامس ..

نعم الله .. من الطابق الخامس طاحت الحرمة ... وأول ما طاحت وقفنا بسيارةالاسعاف .. ونزلنا .. وانا كنت منصدم من المنظر اللي شفته ...

وصلنا عند الحرمة وكانت ممددة على ظهرها ..

كان وياي ممرض فلبيني .. وكان اسمه

((زندل مار ))

اذكر اسمه لليوم والله ...

المهم نزل ونزلت انا وراه أمشي رويدا وانا خائف ..

والله كنت خااايف ساعتها وقلبي ينتفض .. ورجولي بعد تنتفض ..

المهم المرأة هذي كانت خدامة من الجنسية البنقالية .. ممددة على ظهرها وبعدها ما ماتت .. (( حية )) .. نزلنا وكانت عندنا شنطة الاسعافات الأولية .. نسميها Blue Bag (( الشنطة الزرقاء )) ... تخذناها وسرنا عند الحرمة اللي كانت طايحة .. وكانت حالتها خطيرة جدا طبعا ..

أول ما وصلنا قال لي الفلبيني حط مثبت الرقبة على رقبتها .. تعرفون ليش ؟؟

مثبت الرقبة شي ضرووري ومهم جدا جدا في جميع انواع الحوادث .. لان الرقبة فيها النخاع الشوكي ..

اذا انقطع النخاع الشوكي هذا يؤدي الى شلل أو موت .. (( الأعمار بيد الله ))

المهم كنت مرتبك ساعتها .. وما عرفت شو أسوي .. الفلبيني جزاه الله خير .. جاء وركب لها مثبت الرقبة ...

المهم ...

انا كنت جاثم وقاعد على ركبي عند راسها ..

الفلبيني يقول لي يا أحمد شيك على راس الحرمة ...

وكنت لابس القفازات .. وشيكت على راسها واذا بي احصل فتحة في راسها ..

والله العظيم شوية وكان بيغمى علي ..

خلاص .. يعني وصلت بي الحالة اني كنت برجع كل اللي في بطني على الحرمة اللي كانت طايحة على الأرض ..

المهم ...

اخذت رباط ولفيت لها راسها عشان اوقف لها النزيف ... (( حالة صعبة في أول يوم أشتغل فيه ))

المهم ...

الحرمة هذي كانت عندها كسور في الجمجمة .. والقدم اليمني والفخذ الأيمن .. وخلع في الكتف الأيمن .. وكسور في الحوض وفي كل مكان تقريبا ...

شليناها للمستشفى بسيارة الاسعاف ...

بعد ما وصلنا للمستشفى المركزي في أبوظبي .. انا قعدتت في قاعة الانتظار فترة ربع ساعة وانا بعدني في صدمة من الشي اللي انا شفته في مكان الحادث ...

جاني سائق الاسعاف وقال لي شو فيك يا بو شهاب .. قلت له هذي أول مرة أشوف فيها دم بهذي الطريقة ...

حتى اتذكر اني تضايقت من كلامه .. لانه كان يقول لي تذكر الشحم اللي كان طالع من رجولها .. تذكر كيف كانت تصارخ من ألألم .. تذكر كيف كانت الفتحة اللي في راسها ..

قززني وخلاني اليوم الثاني أطلب نقل من عنده ...

لا محالة .. يوم انتقلت العين طلب انه يداوم عندي لاني انا الوحيد اللي هو يعرفني ..

بس الحين تعودت عادي على الدم والحوادث ...

لو يقول اللي يقوله لي عادي عندي



===================
===================


الى اللقاء في قصة أخرى ..

تحياتي

(* 2 *)

قصة واقعية أخرى .. في أبوظبي دار الظبي ...

وفي نفس المكان .. كنت مداوم ساعتها في شارع الكورنيش بعد مرور ثلاث اسابيع تقريبا على الحادث الأول ...

المهم .. وصلنا بلاغ من العمليات يفيد بوجود شخص عند فندق الشيراتون أو قريب منه وعنده حالة نزيف .....


حالة نزييف !!؟؟

توجهنا بكل السرعة لمكان الحادث .. وكنت يومها مع ممرض تونسي اسمه (( أبو علي )) هذا الممرض كان دمه حار .. يعني من النوع العصبي جدا ..

يعصب من أي مزحة أو ضحكة ..

المهم وصلنا لمكان الحادث .. وانا قلت له يا بو عبي انت نزل الشنطة الزرقاء .. وانا بنزل الاستريتشر

(( الاستريتشر )) : السرير المتحرك اللي ينام عليه المصاب ..

المهم انا نزلت السرير وكان أبو علي يركض ..

وفجأة يانا واحد من الجنسية العربية يركض لنا ..

وانا وصلت عنده وسألته انت اللي بلغت الشرطة عن وجود حالة نزيف هنا ؟؟

قال لي أيوةأنا ... قلت له طيب وين المصاب ؟؟؟

أشر على نفسه وقال .. أنا المصاب ...

صابتنا حالة من الذهول شوية والغيظ أكثر ...

المهم قلت له وين النزيف اللي تتكلم عنه ؟؟

طلع لي صبعه (( السبابة )) وقال هنا ؟؟؟؟؟؟؟؟!!!!!!!!!!!!


طبعا نحن استغربنا من كلامه ..

اتضح لنا في النهاية انه هالشخص كان قاعد يصيد سمك على كورنيش أبوظبي ..

وبعدين لما سحب الصنارة كان قاعد يكب الطعم .. وفجأة (( الميدار )) مال الصنارة جرحه في صبعه ...

واتصل في الشرطة وبلغهم عن وجود حالة نزيف ..

المهم

قال لنا عندكم (( مطهر ) = (( معقم ))

طبعا نحن مرررررة عاااد .. مستشيطين من القهر اللي فينا ...

قلت له يا حبيبي المطهر ما بيفيدك ... انت تعرف انه هذا بحر والبحر غدار .. وما تعرف شو كان داخل الميدار .. يعني تعرف طعم .. وماي .. وملح .. وترسبات .. يمكن هالشي يصيبك بطفح جلدي .. فلازم تركب سيارة الاسعاف ونوصلك لين المستشفى ..

طبعا هو ما طاع .. لان سيارته كانت واقفة عند الباركنات اللي عند الكورنيش .. فقعدنا ننصح فيه انه يركب سيارة الاسعاف عشان نوصله للمستشفى الين ما اقتنع أخيرا ..


المهم شليناه ونحن معصبين .. ووصلنا للمستشفى المركزي اللي يبعد عن مكان البلاغ تقريبا 10 كيلو غير الاشاير والزحمة ..

من العصبية النرفزة طبعا نحن قلنا بنعقه في آخر الدنيا ..

قهر والله ...


المهم عقب ما خلصنا ونحن راجعين .. قال لي أبو علي ..

شكون (( كلمة تونسية تعني كيف ))

شكون يا بو شهاب هذا الراجل يعمل بينا كذا ؟؟

قلت له ما عليك يا بوعلي .. هدي نفسك والحين باخذ لك ساندويش من مطعم العلمين في أبوظبي ..

مطعم العلمين كان أكثر اللي ياكلون فيه توانسة من قسم الاسعاف والانقاذ

خخخخخخخخخخخخخخخخخخخخ


====================
====================


نتقابل ان شاء الله في قصة أخرى ..

تحياتي للجميع

(*3*)

قصة واقعية أخرى في أبوظبي حدثت ..

كنت ساعتهامداوم في آخر الليل ...

وكان سائق الاسعاف واحد ثاني طبعا ...

المهم هالحالة كانت صعبة شوية ..

صحيح اني ساعتها خلاص تعودت على الدم وغيره .. بس هالحالة كانت شي ثاني ..

احكيها لكم وانتوا أحكموا على اللي صار ...


==============
==============

آخر الليل .. كانت الساعة 3:30 قريب الفجر تقريبا .. انا تذكرت الوقت لانه كان وقت قريب من انتهاء فترة دوامنا ..

كان دوامنا ينتهي الساعة 5 الفجر ..

المهم ..

بلغنا في ذلك الوقت عن وجود حالة مرضية في احدى الشقق في منطقة شارع الكترا في أبوظبي ...

توجهنا بسيارة الاسعاف الى مقر البلاغ .. ووجدنا رجل من الجنسية العربية ينتظرنا تحت ..

نزلت انا والممرض فقط لنرى ما هي الحالة ولنحدد امكانة ذهاب المريض الى المستشفى ..

تدرون شو كانت الحالة ؟؟؟

V
V
V
V
V
V
V
V
V
V
V


حالة وضع (( ولادة ))

...............


أول رة اشارك في نفس هالحالات ..

تخيلوا صعوبة المنظر والحدث ...

المهم ...

كانت المراة اللي بتولد من الجنسية العربية الأفريقية ..

نزلناها وحطيناها في سيارة الاسعاف ...

عاد تخيلوا الصراخ اللي سمعوه اهل العمارة كلهم ..

المهم .. حطيناها في سيارة الاسعاف .. وكان ساعتها عندي ممرض من الجنسية التونسية وكان اسمه ((صلاح))

وكنت انا وياه في كابينة سيارة الاسعاف الخلفية ..

كنت احط للحرمة الاكسجين وهو كان يقيس لها الضغط ويحط لها المغذي ... المهم الحرمة تصارخ في السيارة وانا منصدم من المنظر وأقول شو هالبلشة اللي ابتلشت فيها في قسم الاسعاف والانقاذ .. شو هالمصيبة اللي طاحت على راسي .. فجأة قطع حبل أفكاري ((كـــف)) على ويهي .. الا الحرمة ضربتني كف والله على ويهي .. وقاعدة تسبني ..

وانا يالس أقول لها قولي لا اله الا الله ..

وهي تقول لي انا ما بمووت انا بولد يا حيوان ومثل هالكلمات ..

انا مصدوم من المنظر وفي نفس الوقت خاطري اصيح من الكف اللي عطتني اياه ...

المهم الممرض اللي وياي كان مستعد لأي حالة طارئة ..

وانا كنت عند راسها أمسح لها العرق واهديها ..

وهي قاعدة تسبني سب والله .. حتى انها دخلت أهلي في السالفة .. بس طبعا ما أقدر اناقشها ..

حالتها هذيج الساعة كانت صعبة وكانت بدون تفكير ...


وفجأة سمعنا صوت طفل يبكي في سيارةالاسعاف ...

(( ربــــــت ))

هيه والله انها ولدت في السيارة ..
في سيارة الاسعاف ربت الحرمة ...

يا رب لك الحمد ...

افتكيت من الضرب والشتيمة ..

لفينا الولد بمنشفة .. وتمينا لين ما وصلنا للمستشفى ..

والحمدلله الولد صحته جيدة .. وزوج الحرمة وصل عقبها بعشر دقايق للمستشفى وباركنا له ..

وانا يا حظي ..

مصفوع بكف على ويهي .. ولا حد قال لي حتى تعيش وتاخذ غيرها ..




==================
==================
==================


ان شاء الله نلتقي في قصة أخرى

أخوكم

مشكور اخوي على الرد

مشكورررررررررررررررررررررر اخوي على القصه

مشكور اخوي على المواقف هذه اللي ان شاء الله تكون تعلمت منها

وننتظر منك المزيد