مسكينة وهبلة شوية

كان في واحد رجال فقير وغلبان .. متجوز واحدة ست مسكينة وهبلة شوية .. كانت لما تزور الجيران وتشوف دي لابسة حلق جديد والتانية لابسة جوز بناجر والتالتة عندها فستان حلو تتأسف على حالها وتروح تطلب من جوزها فيقول لها : ياشيخة الرزق على الله وإحنا رزقنا على قدنا ..
واحد يوم أحرجته من كتر ما تطلب فخلص نفسه وقالها : ربنا والحمد لله جاد علينا وأنا حوشت لي قرشين و أبغى أشتريلك بهم حلق من نفسك . فرحت المسكينة ودارت على الجيران وقالت لهم : جوزي في دي اليومين راح يجيب لي حلق دهب .. قعدت تهلل شهر زمان وهي تغلق من دي الجارة تروح للتانية ومن هادول الأقارب للتانيين .. ولما يطلع جوزها ما عندها معاه سيرة إلا الحلق فين .. ولما طفش من أسألتها المستمرة فكر يعجزها ويكسب وقت أطول فقال لها : يا شيخة ما سكتلي حلق حلق وإنت حتى مافي إذنك خرق .. روحي أخرقي إدنك أول وبعدين أجيب لك حلق .
خلته يخرج من هنا وقامت جابت مسمار ودقته في أودانها إلاكل إدن ورورت وورمت وصارت ملتهبة وفي حاله صعبة .. رجع الرجال البيت وشاف حالتها المبهدلة .. وقبل ما يسألها عن حالها سألته هي : فين الحلق ؟ قال لها : والله شكلك ماراح تقدري تلبسي حلقان ولا هباب وبأفكر بدل ما أجيب لك حلق أجيب لك بناجر . فرحت ودارت على الأهل والجيران تقول لهم : بطلنا من الحلق .. جوزي راح يجيب لي جوز بناجر .. وكل ما يطلع جوزها البيت تسأله فين البناجر ؟ وكل ما يخرج تفكره وتقول له : لا تنسى البناجر .. وهو كل يوم يطلع لها بحجة شكل , مرة يقول لها واحد أستلف الفلوس .. ومرة يقول لها لقيت الدكان مقفل .. ومرة يقول لها كنت بالمرة مشغول وما مداني أروح .
وفي يوم رجع البيت طفشان زهقان وهادي قابلته عند الباب وسألته بلهفة : ها .. جبت البناجر ؟ قال لها : يا شيخة .. الصراحة يدك متينة وماني لاقي مقاسك في السوق .. خلته خرج من هنا وقامت جابت السكينة وهات يا قشط في يدها إلى أن صارت رفيعة زي الخيط وصار كمان دمها حميم .. لما رجع جوزها البيت وشاف عملتها قالها : أنا مسافر وتارك لك البلد تشبعي بيها بهبلك وماراح أرجعلك إلا لو لقيت في أرض الله الواسعة ناس أهبل منك .. و أخد بعضه ولم حوايجه وهج من البلد ..
مشى ومشى لحد ما جات رجله على المينا .. ولقى باخرة مسافرة قال لهم خدوني معاكم وأشتغل على سطح المركب و ألقط رزقي .. و أبحروا كام يوم ووقفوا عند واحدة بلد وهو نزل معاهم .. لقى أهل البلد بيجروا ويتسابقوا ويقولوا يا ساتر .. يا ساتر أستر .. ووقف معاهم عند قصر كبير عرف إنه بيت السلطان ولقاهم كلهم مرعوبين وبيبكوا ويصوتوا .. و أخيرا لقى واحد عجوز واقف على جنب فسأله عن الحكاية .. قال العجوز : بنت السلطان اليوم أتجوزت ودوبنا كنا في فرح وسرور لكن لما جوا يدخلوها القصر طلعت طويلة ورقبتها أطول من درفة الباب .. وبيت العريس يقولوا إلا نقطع لها رجولها عشان تقدر تدخل .. وبيت العروسة يقولوا أبدا لازم يهدوا باب البيت ويبنوه تاني مرة ويعلوه على قد راسها .. وإحنا الآن في ورطة وما حد عارف كيف نطلع منها ؟ أستغرب من كلام العجوز وراح يزاحم بين الناس : وخروا لي .. وخروا لي .. ودخل لفتحة الباب وقال للحراس : أنا أحل المشكلة .. ووصل عند العروسة ولقاها واقفة عند عند الباب منكدة فأعطاها جُمع في رقبتها كفى لها راسها ودخلت ..وفرح أهل البلد وغطرفوا وقوموا الأفراح من جديد .. وأحتفلوا به أهل العريس و أهل العروسة و أعطوا له هدايا وفلوس وشي وشواشي .. قال في نفسه : هم صحيح هبل وعبط .. لكن برضه مو في عبط مراتي .. ورجع على المركبة بعد أسبوع ولقاها مستعدة للسفر بعد ما أخدوا المؤنة والحاجات وطلع معاهم بثروته الجديدة وشدوا قلوعهم و أبحروا ..
ومشيوا في البحر كام يوم لحد ما وصلوا بلد تانية ونزلوا فيها يتمونوا ويجيبوا الزوادة ويريحوا من السفر .. وفي وسط البلد لقى ناس عاقلين وموزونين ما عليهم من سمات العبط إلا المريلة إللي كان كل شخص معلق واحدة في رقبته ورياقينهم سايلة .. وصار ماشي بينهم قرفان عمره منهم .. وقت الغدا جا ياكل لقى الأكل صامت من غير ملح وسألهم قالوا ما يعرفوا يعني إيش ملح .. فأستغرب وجري على المركب وشال كمية من الملح وباعها عليهم .. فأنبسطوا من الطعم وصاروا يشتروا منه بالملعقة .. وباع عليهم إلى أن أغتنى , وفي ميعاد السفر رجع المركب وهو بيقول : برضهم ماهم أهبل من مراتي .. وما راح أرجع لها .
في البلد إللي بعدها نزل من المركب وشافه عمدة البلد إنه غريب فأستضافه ولقي إنه هو وأهل بلده ناس عقال و موزونين وقال في نفسه : دول ناس باين عليهم عين العقل وشكلي كده راح أعيش بينهم وما أسافر أبدا .. وعند الغدا وبعد ما مدوا السفر على الأرض أترصوا العبيد حوالينها وكل واحد شايل شوحط كبير .. وخاف يكون الأكل عندهم بالضرب .. لكن لما دخل الأكل ماشاف إلا الفيران أقبلت من كل الجهات وهجمت على الأكل والعبيد وراهم أخبط أرقع يهبدوا في الفيران ويطردوهم عشان الناس تعرف تاكل وعلى هادا الحال لحد ما انتهى الغدا .. وبعد الأكل قال لهم : أنا عندي حل لمشكلتكم .. وراح على المركب وجاب من سطحها بسه كان صاحبها واحد من البحارة .. ورجع لهم وفلتها على الفيران ونزلت عليهم لحد ما قضت على بكرة أبيهم .. فرحوا به وضيفوه وطلبوه البسه يحتفظوا بيها , قال : إن كان تغطوها بالدهب .. جابوا الدهب وصاروا يغطوا البسه وهي تنفضه بديلها لحد ما كتر الدهب وغطاها .. وأخد الدهب وباع لهم البسه ورجع على المركب وأبحر معاهم وهو يقول : أما ناس هبل .. لكن لسه مو في هبالة مراتي .
وفي البلد إللي بعدها نزلوا من المركب وسمعوا أهلها بيصرخوا ويقولوا : سر بلدنا خرج .. سألهم سبب صراخهم فأشروا له على بيت منشور على طنفه جلالة كبيرة وقالوا له : إحنا عندنا عيب كبير لما تظهر جلايلنا فوق السطوح وماحد عارف نعمل إيش ! قال : وروني الطريق وأنا أخلصكم من هادا العار .. وطلع السطوح ونزل الجلالة من فوق الطنف .. وقال الناس كلهم على صوت واحد : الله أكبر .. وشالوه على روسهم وأنعموا عليه وضيفوه أسبوع بكامله .. وآخر الأسبوع رحل مع المركب المسافر وأخد معاه كل الأموال إللي كسبها وهو بيقول في نفسه : أما ناس مجانين صحيح ! لكن برضه أرحم من مراتي ..
وهو في الطريق للمينا لقي وحدة عجوزة ماسكة منخل ونازلة نخل في التراب .. فأستغرب نخل التراب وقرب منها وسألها : تحتاجي مساعدة يا أمي ؟ قالت لو معاك منخل كان دورت معايا .. قال لها : إنت ضايعلك أيش بالضبط ؟ أهو يا ولدي .. نصيبنا .. قال لها : يعني بتدوري على أيش ؟ قالت جوز بنتي خرج من يومين وما رجع البيت .. فخرجت أدور عليه وقلت يمكن ألاقيه هنا .. وفرصع عينه من شدة دهشته وقام من جنبها جري وقال : هي الناس صار لها إيش في عقلها ؟ ووصل للمركب وسافر بسرعه مع المسافرين .
وفي البلد إلي بعدها لقي ناس عقال هادئين ما عندهم أي شي يكدر عليهم .. لما قرب الضهر قام يتوضا لكن الأوادم ما قاموا .. قال لهم : هادا ايه ؟ إنتوا ما تصلوا ؟ قالوا : إيش صلاة ؟ قال : أنا اعلمكم .. وعلمهم الصلاة وأصول الدين وبنى لهم مسجد وصاروا بحمد الله مسلمين .. وطلبهم حصيرة يفرش المسجد ما لقي عندهم حصير ففرشوه بألواح الخشب .. وفي يوم من الأيام وهو بيصلي وهم من وراه يعلموا زي ما يعمل سجد على الخشب إلا أنحشر خشمه بين لوحين من الألواح .. صار يصوت ويقول : ياخشمي .. والجماعة من وراه تصرخ وتقول زيه : ياخشمي .. يقول : يا ناس ألحقوني .. يردوا عليه : ياناس ألحقوني .. يصرخ .. يزعق مافي فايده وألمه يزيد ولحمة خشمه تبغى تنقطع وماحد داري عنه لولا فرج الله إللي بفضله أنفك خشمه من بين الخشب .. وقال : توبة لله .. الدنيا فيها ناس أهبل من مراتي ..
وفي المينا شد الرحال ورجع لمراته وهو غني و أشترى لها الحلق والبناجر وسكنها في قصر وهناها ومناها وعاش معاها في التبات والنبات وخلفوا صبيان وبنات ..



تحياتي: moon88

شكرا اخوي MOON88 على القصه والله يعطيك العافيه ونتظر جديدك المميز